Deputeti i Lëvizjes Vetëvendosje, Nezir Kraki ka deklaruar se mundësia që në Mitrovicën e Jugut të ketë rivotim është “baras me zero”.
Sipas tij, manipulimi i rezultateve zgjedhore në Kosovë është pothuajse i pamundur.
Në një intervistë në emisionin “Mesditë” në Tëvë1, Kraki ka theksuar se Mitrovicën e Jugut duhet ta udhëheq Faton Peci, të cilin e vlerësoi si njeri punëtor dhe të sinqertë.
Ai ka akuzuar PDK-në se po përpiqet ta dëmtojë fituesin e zgjedhjeve lokale në këtë komunë.
“Jemi në muajin e dhjetë që PDK me këta partitë e tjera ende s’janë pajtuar me humbjen. Këta vazhdojnë me pretendua se kanë fituar edhe me 9 shkurt, me sjelljen politike që këta e kanë treguar. Këta mendojnë që kanë fituar dhe me çdo çmim donë që me ia dëmtua fituesit. Mundësia për me manipulua rezultatet e zgjedhjeve në Kosovë është tepër e vogël. Votimi vetëm për kryetar është më i thjeshtë se votimi për asamble komunale, gjithçka është kaq e qartë. Është shumë më mirë që Mitrovica me u qeverisë prej Faton Pecit i cili është dëshmua punëtor i madh, i sinqertë, ministër i suksesshëm, patriot – të gjitha vetitë i ka – me u sigurua që ajo pjesë e Kosovës mos me na dalë prej terezisë dhe mos me na dal prej kontrollit. Gjasat janë baras me zero që VV-ja të shkojë në rivotim në Mitrovicë të Jugut. KQZ ka dalë dhe ka treguar se çka ka ndodhë. Këtu kush të vendosë, PDK-ja që të shkojë? Nëse ka ndodhë diçka, unë jam që të verifikohen dhe të sqarohen të gjitha,” ka deklaruar Kraki./teve1.info/
