300 kadetë të Forcës së Sigurisë së Kosovës kanë nisur testimin fizik të hënën. E kjo po mirëpritet nga njohës të fushës, meqenëse kërkohet që të rritet numri i pjesëtarëve që bëhen pjesë e këtij institucioni, krahas ngritjes operacionale të FSK-së.
Të hënën nisën testimin fizik 300 kadetët e rinj që u pranuan në konkursin e fundit për t’u bërë pjesë e Forcës së Sigurisë së Kosovës.
Nga Ministria e Mbrojtjes është bërë e ditur se ky është konkursi i katërt brenda katër viteve që është hapur për pranimin e ushtarëve.
Sipas këtij dikasteri numri i të rekrutuarve gjatë kësaj kohe është 2 mijë e 271.
E koloneli në pension po vlerëson se shtimi i numrit të rekrutëve të rinj është i mirëseardhur për FSK-në.
Veçse thotë se kjo rritje nuk mund të bëhet në një afat kohor të shkurtër, por që duhet shkuar gradualisht.
“Duke rekrutuar një numër të konsiderueshëm apo të nevojshëm për momentin të pjesëtarëve aftësimin e tyre, angazhimin e tyre dhe pastaj të vije radha prapë për grupin tjetër i cili mund të absorbohet nga kapacitetet trajnuese dhe shkolluese të vet Forcës së Sigurisë së Kosovës dmth janë disa mekanizma që e kushtëzojnë edhe numrin e pjesëtarëve të cilët mund të pranohen brenda për brenda Forcës”, thotë Hysen Gecaj, kolonel në pension i FSK-së.
Kurse profesori i shkencave të sigurisë, Avni Islami thekson se krahas ngritjes së kapaciteteve operacionale, FSK duhet të fokusohet edhe në shtimin e numrit të ushtarëve.
“Përveç fokusimit në armatim paralelisht me të e njëjta po ndodhë edhe me oficerë e ushtarë të cilët janë duke u përgatitur të jenë të aftë për mbrojtje por edhe përdorimin e mjeteve të cilat janë risi për ushtrinë e Kosovës, kështu që unë besoj që edhe në të ardhmen do të vazhdojë armatosja e e FSK-së”, thotë Avni Islami- profesor i shkencave të sigurisë.
Krahas kësaj, në dy vitet e fundit numri i pjesëtarëve të FSK-së që janë larguar nga ky institucion është 251.
Ndryshe, buxheti i ndarë për vitin 2024 në fushën e mbrojtjes është më i larti ndonjëherë që kap vlerën e 153 milionë eurove.
