Proceset zgjedhore të ardhshme, të gjitha do ta kenë risinë që kishin zgjedhjet në veri të vendit.
2 mijë e 500 kamera janë planifikuar të blihen nga Komisioni Qendror i Zgjedhjeve, për të cilat është paraparë buxheti prej 1 milionë e 500 mijë euro.
Këto kamera do të bëjnë regjistrimin e të gjithë aktivitetet në ditën e zgjedhjeve gjatë procesit të votimit dhe numërimit.
Sistemi i regjistrimit me kamera në vendvotime bëhet me qëllim të garantimit të sigurisë së materialeve të ndjeshme dhe ruajtjes së integritetit të procesit të votimit dhe numërimit, në vendvotime. Me ndihmën e sistemit të kamerave do të bëhet regjistrimi pasiv i veprimeve në vendvotim. Regjistrimi mund të përdoret më pas për verifikimin e pretendimeve për shkelje të procedurave.
Funksionalizmi i kamerave po shihet si mundësi e mirë për shmangien e parregullsive.
“Vendosja e kamerave nëpër vendvotime do t’i evitonte në minimum mundësitë e parregullsive në proces zgjedhor, dhe parregullsitë do të rezultonin në aspektin njerëzor, në aspektin e numërimit të votave ku mund të ketë parregullsi, me apo të paqëllimshme, por të cilat mund të korrigjohen në qendrën e numërimit”, ka thënë juristi Anton Nrecaj, nga instituti Clard.
Mirëpo, ka kritika për mënyrën e vendosjes strategjike të kamerave përbrenda hapësirave ku zhvillohet procesi i votimit.
“Me vendosjen e kamerave ku vërehet votuesi nga pjesa e pasme, pra nga shpina, mund të ndikojë në perceptimin e tyre se fshehtësia e votës nuk është duke u respektuar. Me ç’rast kjo mund të ndikojë edhe në uljen e besimit të publikut, por më së keqi mund të ndikojë në demotivimin e votuesve për të marrë pjesë, shprehet Eugen Cakolli nga KDI.
Për evitimin e problemeve potenciale me këto kamera, janë kërkuar përkrahje teknike në teren, të cilat do të jenë në vendin e ngjarjes, jo më shumë se 30 minuta pas pranimit të thirrjes.
