Komisioni Qendror Zgjedhor (KQZ) ka pezulluar Partinë Republikane për Ndryshime dhe Partinë Shpresa Demokrate, pasi nuk kanë dorëzuar raportet financiare për periudhën 1 janar-31 dhjetor 2024.
Përkundër gjobës së vendosur, të njëjtat nuk kanë dorëzuar pasqyrat financiare deri në afatin e paraparë deri më 1 mars 2025. Megjithatë për çregjistrimin e plotë të tyre u tha se do të vendoset pas një afati shtesë prej 15 ditësh për t’i dërguar raportet financiare.
Drejtori i Zyrës për regjistrim, certifikim dhe kontrollin financiar të subjekteve politike, Besnik Buzhala paraqiti arsyet para anëtarëve të KQZ-së për pezullimin e këtyre dy partitë politike.
“Partia Republikane për Ndryshime me akronimin PRN është regjistruar nga KQZ-ja si parti politike në vitin 2021. Ky subjekt politik i regjistruar ka qenë i obliguar të dorëzojë raportin financiar më 1 mars 2025 për pasqyrat që përfshinë periudhën 1 janar-31 dhjetor 2024. Duke qenë se ky subjekt politik nuk është përmbajtur afatit të përcaktuar me Ligjin për financimin e subjekteve politike, zyra ka shqiptuar gjobë ndaj këtij subjekti politik ku e ka obliguar që në periudhën gjatë 15 ditëve të sjellë në zyre raportin vjetor financiar. Meqenëse këtë raport nuk e ka dorëzuar në afatin e përcaktuar, zyra i rekomandon KQZ-së që të pezullojë subjektin politik Partia Republikane për Ndryshime…Të obligojë partinë që në afat shtesë prej 15 ditësh të dorëzojë afatin për raportin vjetor financiar…Të njëjtin rast e kemi edhe subjektin politik Shpresa Demokrate. Po ashtu edhe ky subjekt i regjistruar nuk është përmbajtur detyrimeve ligjore”, tha ai.
Ndërsa, kryetari i KQZ-së Kreshnik Radoniqi, i pyetur nga gazetarët, nuk pranoi të komentojë vonesat e mundshme për certifikimin e rezultateve të zgjedhjeve parlamentare të 9 shkurtit.
“Po presim vendimin e PZAP-së”, tha shkurt ai.
Lëvizja Vetëvendosje të hënën ka dorëzuar ankesë në PZAP, duke kërkuar anulimin e votave me postë të LDK-së, si dhe rinumërimin e votimit me postë./kp
