Komisioni Qendror i Zgjedhjeve ka miratuar një sërë vendimesh që lidhen me përgatitjet për raundin e dytë të zgjedhjeve për Kryetarë të Komunave, i cili do të mbahet të dielën, më 9 nëntor.
Gjatë mbledhjes, një ndër pikat kryesore të rendit të ditës ishte procesi i akreditimit dhe konfirmimit të vëzhguesve të subjekteve politike, organizatave vendore e ndërkombëtare, si dhe përfaqësuesve të mediave që do të monitorojnë balotazhin.
Në hapje të mbledhjes, KQZ mori vendim për akreditimin dhe konfirmimin e 8,049 vëzhguesve të shtatë subjekteve politike të certifikuara, të cilat garojnë në raundin e dytë të zgjedhjeve për Kryetarë të Komunave.
Këta vëzhgues do të jenë të angazhuar në qendrat e votimit në të gjitha komunat ku do të zhvillohet procesi zgjedhor.
Më tej, KQZ miratoi edhe akreditimin e vëzhguesve nga organizata të ndryshme joqeveritare dhe përfaqësi diplomatike, të cilat do të kenë mandat për të monitoruar ecurinë e procesit zgjedhor gjatë balotazhit të 9 nëntorit.
Në përfundim të mbledhjes, Komisioni vendosi gjithashtu për akreditimin e përfaqësuesve të mediave vendore dhe ndërkombëtare, të cilët do të raportojnë në kohë reale nga qendrat e votimit dhe do të ndjekin zhvillimet përgjatë ditës së zgjedhjeve./teve1.info/
