Komisioni Qendror i Zgjedhjeve ka njoftuar se procesi i votimit në raundin e dytë të zgjedhjeve lokale është mbyllur në orën 19:00.
Kryetari i Komisionit Qendror të Zgjedhjeve, Kreshnik Radoniqi tha se bazuar në informacionet nga Komisionet Komunale të Zgjedhjeve, votimi është zhvilluar në mënyrë të qetë dhe pa incidente që do të mund të vinin në dyshim besueshmërinë, integritetin apo ecurinë e procesit zgjedhor.
Në emër të KQZ-së, është shprehur falënderim për institucionet që kanë kontribuar në mbarëvajtjen e procesit, përfshirë Policinë e Kosovës dhe Prokurorinë e Shtetit.
Sipas të dhënave preliminare nga rreth 99% e vendvotimeve, deri në orën 19:00 kanë votuar 429 mijë e 736 qytetarë apo 32.64% e atyre me të drejtë vote, nga gjithsej 1 milion e 316 mijë e 672 votues. Në të njëjtat komuna, në raundin e parë kishin votuar 38.91% apo 512 mijë e 160 votues.
Aktualisht në vendvotime po zhvillohet procesi i numërimit të fletëvotimeve, ndërsa në disa prej tyre ky proces tashmë ka përfunduar. KQZ ka njoftuar se në platformën e saj do të fillojë publikimi i rezultateve preliminare.
Numërimi i votave është theksuar si një hap kyç në përmbylljen e ditës së zgjedhjeve dhe zhvillohet sipas procedurave ligjore e rregulloreve të KQZ-së. Institucioni u ka bërë thirrje anëtarëve të Këshillave të Vendvotimeve që të veprojnë me përgjegjësi, profesionalizëm dhe paanshmëri, për të garantuar dhe mbrojtur plotësisht vullnetin e qytetarëve.
KQZ ka bërë të ditur gjithashtu se nga ora 19:00 ka nisur afati 48 orësh për paraqitjen e ankesave në Panelin Zgjedhor për Ankesa dhe Parashtresa lidhur me procesin e votimit të sotëm.
