Komisioni Qendror i Zgjedhjeve ka vendosur që kufiri i sipërm i shpenzimeve për fushatën zgjedhore në raundin e dytë të zgjedhjeve për kryetarë komunash të jetë 2 milionë e 633 mijë e 344 euro.
Vendimi, i marrë me procedurë qarkulluese në mbledhjen e kryesuar nga kryetari i KQZ-së, Kreshnik Radoniqi, bazohet në listën e votuesve brenda vendit, e cila përmban 1 milion e 316 mijë e 672 votues, duke përcaktuar kufirin prej 2 eurosh për çdo votues të regjistruar.
Fushata zgjedhore për subjektet politike dhe kandidatët e raundit të dytë do të zhvillohet nga 3 deri më 9 nëntor 2025, deri në orën 06:59 të mëngjesit.
Sipas vendimit të KQZ-së, subjektet politike nuk mund ta tejkalojnë shumën e përcaktuar të shpenzimeve në komunat ku garojnë në raundin e dytë të zgjedhjeve.
