Komisioni Qendror i Zgjedhjeve ka miratuar sot planin për organizimin e procesit të votimit jashtë vendit për zgjedhjet e parakohshme parlamentare të 28 dhjetorit 2025.
Sipas vendimit të KQZ-së, procesi i votimit planifikohet të organizohet në 50 përfaqësi diplomatike me gjithsej 66 vendvotime, të vendosura në 36 shtete të ndryshme të botës.
Megjithatë, kjo listë do të mund të rishikohet nga KQZ, varësisht nga numri i votuesve që do të regjistrohen për të votuar në përfaqësi diplomatike
Gjithashtu, KQZ caktoi numrin maksimal 950 votues që mund të regjistrohen për të votuar në një vendvotim në përfaqësi diplomatike, ndërsa numri maksimal i përgjithshëm i votuesve që mund të regjistrohen në këto qendra arrin në 62 mijë e 700.
Përveç hapësirave diplomatike, Qendra të Votimit do të hapen edhe në lokacione shtesë, jashtë përfaqësive zyrtare, me propozim të Ministrisë së Punëve të Jashtme dhe Diasporës.
Këto lokacione shtesë përfshijnë 10 qendra votimi (5 në Gjermani, 3 në Zvicër, 1 në Mbretërinë e Bashkuar dhe 1 në SHBA), me gjithsej 43 vendvotime, ku mund të regjistrohen deri në 40 mijë e 850 votues.
Në mbledhje u prezantua edhe Lista Preliminare e Votuesve për zgjedhjet e parakohshme për Kuvendin e Republikës së Kosovës, të cilat do të mbahen më 28 dhjetor 2025.
Lista përmban 2,076,422 qytetarë me të drejtë vote, prej të cilëve 1,067,499 janë burra dhe 1,008,923 gra.
Lista aktuale ka 7,324 votues më shumë sesa në zgjedhjet lokale të 12 tetorit 2025.
Në fund të mbledhjes, KQZ mori vendim për miratimin e sloganit zyrtar të zgjedhjeve të parakohshme për Kuvendin e Kosovës, të cilat do të mbahen më 28 dhjetor 2025.
Slogani i fushatës informuese është: KOSOVA VOTON./teve1.info./
