Përmes një komunikate, KPK u shpreh se që nga hartimi i Strategjisë për sundimin e ligjit dhe iniciativat e Ministrisë së Drejtësisë, me partnerët ndërkombëtarë kanë dhënë kontribut për implementimin e saj.
“Ky nxitim i Ministrisë së Drejtësisë për të proceduar me shpejtësi këtë draft të projektligjit, pa e ndarë draftin final me aktorët e këtij procesi dhe pa i pritur komentet shtesë të Komisionit të Venecias, si dhe pa i marrë parasysh edhe propozimet e dala nga Strategjia për sundimin e ligjit dhe ato të përfaqësuesve të sistemit prokurorial, është tendencë për të cenuar pavarësinë e Këshillit Prokorurial dhe Prokurorit të Shtetit, si institucione të pavarura dhe kushtetuese’, thuhet ndër tjerash në komunikatë.
Sipas KPK-së, MD-ja me vetëdije dhe në emër të reformave synon që të bllokojë sistemin prokurorial.
“Kjo praktikë tregon qartazi se sponsorizuesi i këtij projektligji, në këtë rast Ministria e Drejtësisë, me vetëdije dhe në emër të reformave synon që të bëjë të kundërtën e reformës – bllokimin dhe defunksionalizimin e sistemit prokurorial. Çdo iniciativë e këtij lloji, pa respektuar ndarjen e pushteteve, bashkëpunimin dhe koordinimin e ndërsjellë, sjellë dështim dhe krijon hapësirë për ndërhyrje të jashtme në Këshillin Prokurorial të Kosovës”, shton ndër tjerash KPK./teve1.info/
