Këshilli Prokurorial dhe Zyra e Kryeprokurorit të Shtetit kanë reaguar pasi kryeministri Kurti nuk i është përgjigjur urdhër për t’u paraqitur në Prokurorinë Speciale në cilësinë e dëshmitarit për rastin e rezervae shtetërore.
Në një reagim të përbashkët aty është thënë se zbatimi i ligjit nuk keqinterpretohet sipas shijeve, interesave dhe nevojave ditore të Kryeministrit dhe se deklaratat e tij kanë qenë jashtë parimeve bazë të sundimit të ligjit.
“ Sipas KPK-së dhe Prokurorit të Shtetit, këto deklarime përbëjnë vetëm pikëpamje dhe botëkuptime personale që ka ai për sundimin e ligjit, sepse veprimet për zbatimin e ligjit janë detyrim, jo vetëm për sistemin prokurorial, por edhe Kryeministrin, Qeverinë, por edhe për cilindo institucion tjetër dhe qytetar të vendit. KPK dhe ZKPSH, potencojnë se deklaratat e dhëna në vazhdimësi nga Kryeministri Kurti e dëmtojnë seriozisht funksionimin e institucioneve demokratike dhe kanë për qëllim minimin e angazhimit të Prokurorit të Shtetit në përpjekjet për forcimin e sundimit të ligjit në Republikën e Kosovës”, thuhet në reagim.
Aty thuhet se mbështesin Prokurorinë Speciale realizimin e detyrave dhe përgjegjësive ligjore të saj, siç janë hetimi, ndjekja dhe ndriçimi i secilit rast penal që bie në kompetencë të saj, me qëllim të ngritjes së moralit dhe forcimin e detyrimit për respektimin e ligjit në vendin tonë.
Kryeministri i Kosovës sot ka thënë se Prokuroria më shumë po merret me sulmin ndaj Qeverisë se ndaj luftës kundër korrupsionit.
Ai të martën nuk i është përgjigjur urdhrit për të dhënë dëshminë e tij, por ka thënë se është i gatshëm të jap dëshminë në zyrën e tij.
