Selektori i Kombëtares U19 të Kosovës në futboll, Adil Maliqi të premten ka bërë publike listën e lojtarëve të ftuar për ndeshjet kualifikuese të Evropianit 2025.
Maliqi në listën e tij ka ftuar 20 futbollistë për turneun kualifikues që mbahet prej datës 13 deri më 19 nëntor në Prishtinë.
Krahas kësaj, Maliqi ka bërë publike edhe listën e zgjeruar, në të cilën ka përfshirë 9 futbollistë, të cilët do t’i ketë në dispozicion në rast të ndonjë lëndimi të lojtarëve nga lista kryesore.
Kosova është pjesë e Grupit 10, të cilin e përbëjnë edhe Spanja, Austria dhe Ishujt Faroe.
“Dardanët U19 do të luajnë ndeshjet kualifikuese për Evropianin 2025. Ky turnament kualifikues i është besuar për organizim FFK-së nga UEFA”, ka shkruar Federata e Futbollit të Kosovës.
Kosova U19 ndeshjen e parë të këtij turneu do ta luaj më 13 nëntor kundër Austrisë, për të vazhduar me Spanjën më 16 nëntor dhe Ishujt Faroe që përballen më 19 nëntor në duelin e fundit.
Të gjitha ndeshjet, Kosova U19 do t’i luaj në stadiumin “Fadil Vokrri” në Prishtinë.
