Sesioni pranveror në Asamblenë Parlamentare të NATO-s, do të fillojë të shtunën.
E pjesë e agjendës në punimet 3 ditore në Sofje të Bullgarisë, do të jetë edhe Kosova.
Kjo u bë e ditur në agjendën e publikuar nga vet NATO.
“Asambleja pritet të miratojë një reformë të thelluar të partneriteteve të saj dhe të vendosë për kërkesat e Maltës dhe Asamblesë së Kosovës për t’u bërë delegacione anëtare asociuese”, thuhet nga asambleja.
E lajme të mira nga Sofia, presin të zgjedhurit e popullit në Kosovë.
“Ky është hapi i fundit për t’iu ndërruar statusi nga vëzhgues në anëtare asociuar dhe ky është një lajm i mirë shumë presim që të ketë përkrahje nga Asambleja Parlamentare e NATO-s dhe Kosova të avancojë me statusin e vet në këtë asamble dhe të kemi edhe me shumë të drejta”, thotw Enver Dugolli deputet i LVV-së.
Optimist për këtë, janë edhe njohësit e çështjeve të sigurisë në vend
“Mendoj që do të ketë lajme të mira. NATO është shumë e nevojshme për neve. Duhet të kalojmë në fazën e Partneriteti për Paqe për anëtarësim dhe mendoj se kemi plotësuar standardet”, thotë Nuredin Ibishi.
Pjesëmarrës në sesionin pranveror të Asamblesë Parlamentare të NATO-s do të jetë edhe një delegacion nga Kuvendi i Kosovës.
Ndryshe, Kosova është përfshirë në agjendë me rekomandimin e Komitetit të Përhershëm të Asamblesë Parlamentare të NATO-s më 24 mars të këtij viti.
