Kombëtarja e Kosovës në hendboll ka humbur ndeshjen e dytë nga Ukraina në Klaipeda të Lituanisë.
Megjithatë hendbollistët kosovar kanë ende gjasa për kualifikim në Kampionatin Evropian të vitit të ardhshëm.
Ndeshja Ukrainë – Kosovë i takoi Grupit 6 për kualifikim në “Euro 2026”, që mbahet në Danimarkë, Suedi dhe Norvegji.
Kosova pësoi nga Ukraina në Lituani me rezultat 36:25. Ndeshjen e parë në Prishtinë të premten e fitoi me rezultat 31:30.
Lulzim Shabani shënoi pesë gola për Kosovën, ndërsa nga katër gola shënuan Leonard Gegaj dhe Drenit Tahirukaj.
Për Ukrainën më së shumti gola shënoi Ihor Tuchenko. Ai shënoi dhjetë gola, ndërsa gjashtë gola i realizoi Illia Blyzniuk.
Kosova është e treta me tre pikë. Ishujt Faroe janë në vendin e parë me pesë pikë, kurse në vendin e dytë është Holanda me katër pikë. Me dy pikë e fundit është Ukraina. Dy të parët e grupit kualifikohen në Evropian.
Kualifikohen edhe katër përfaqësueset më të mira të vendit të tretë, prej tetë grupeve sa janë gjithsej. Kosova e kërkon rastin përmes vendit të tretë.
“Dardanët” në maj do t’i ketë dy ndeshje vendimtare. Më 8 maj luan ndaj Ishujve Faroe në Prishtinë, kurse më 11 maj ndaj Holandës në udhëtim.
