Me mijëra policë, mjekë, ushtarë, gazetarë e profesionistë të tjerë që do të jenë të angazhuar në ditën e zgjedhjeve më 12 tetor, mund të përballen me vështirësi në ushtrimin e të drejtës së tyre për të votuar.
Ushtrimi i të drejtës së votës mund të bëhet edhe më i vështirë sidomos në zgjedhjet lokale, pasi shumë prej tyre do të jenë në krye të detyrës jo në komunën e tyre ku janë të regjistruar për të votuar.
Madje, në zgjedhjet lokale as votimi me kusht nuk është ndonjë lehtësi e madhe, pasi ky lloj votimi mundësohet vetëm brenda të njëjtës komunë ku është i regjistruar votuesi.
Zëdhënësi i KQZ-së, Valmir Elezi ka shpjeguar për KosovaPress, se votimi i hershëm për këto kategori nuk është i paraparë në Ligjin për Zgjedhjet e Përgjithshme.
“Në Ligjin për Zgjedhjet e Përgjithshme nuk parashihet mundësia e organizimit të ndonjë votimi të hershëm për qytetarët me të drejtë vote, të cilët për shkak të punës së tyre specifike janë të angazhuar në ditën e zgjedhjeve, siç janë: mjekët, policët, ushtarët, zjarrfikësit, përfaqësuesit e mediave, e profesione të ngjashme”, tha Elezi.
As votimi me kusht s’duket se është një mundësi që do t’i përgjigjej të gjitha kërkesave, sidomos në zgjedhje lokale, sepse ky lloj votimi është i mundur vetëm për votuesit brenda komunës ku janë të regjistruar.
“Për dallim nga zgjedhjet për Kuvend, ku e gjithë Republika e Kosovës është një zonë e vetme zgjedhore, në Zgjedhjet Lokale çdo komunë përbën një zonë të veçantë zgjedhore. Në vendvotimet e secilës komunë, KQZ dërgon fletëvotime vetëm për atë komunë. Pra, një votues mund të votojë vetëm në komunën ku është i regjistruar dhe jo në ndonjë komunë tjetër. Për këtë arsye, edhe votimi me kusht nuk është i mundur nga një komunë në tjetrën”, sqaroi Elezi.
Para ditës së zgjedhjeve në Kosovë, mund të votojnë vetëm shtetasit e Kosovës që jetojnë jashtë vendit dhe të cilët duhet të regjistrohen paraprakisht.
“Në Zgjedhje Lokale, Kosova mundëson votimin para ditës së zgjedhjeve për shtetasit që jetojnë jashtë vendit, të cilët duhet të regjistrohen paraprakisht për të votuar përmes postës, një proces që zgjatë disa javë. Ndërkaq, në Zgjedhjet për Kuvend, shtetasit jashtë vendit mund të regjistrohen për të votuar edhe në përfaqësi diplomatike, një ditë para ditës së zgjedhjeve në Kosovë”, shpjegoi Elezi.
Më tej, ai tregoi se KQZ organizon votimin përmes ekipeve mobile të personave me nevoja të veçanta, të cilët, në ditën e zgjedhjeve nuk mund të shkojnë në vendvotimin e tyre.
“Në ditën e zgjedhjeve, KQZ organizon votimin jashtë vendvotimeve të rregullta për votuesit me nevoja dhe rrethana të veçanta, të cilët nuk mund të shkojnë për të votuar në vendvotimin e tyre. Regjistrimi dhe evidentimi i këtyre votuesve mundësohet paraprakisht nga KQZ përmes platformës elektronike, ndërkaq evidentimi i tyre bëhet edhe në bashkëpunim me institucione të ndryshme”, tha Elezi.
Sipas KQZ-së, në ditën e zgjedhjeve ekipet mobile mundësojnë votimin e qytetarëve me lëvizje të kufizuar në ndonjë institucion (votuesit në hospitalizim, njerëzit e moshuar në shtëpitë e caktuara për të moshuarit, personat në trajtim në institucionet e shëndetit mendor, të burgosurit në burgje dhe të paraburgosurit në qendrat e paraburgimit) dhe votuesve me nevoja të veçanta të cilët nuk mund të shkojnë në vendvotim, për shkak të paaftësisë fizike, shëndetësore ose çfarëdo paaftësie tjetër.
Po ashtu, edhe votuesve në rrethana të veçanta, që për shkaqe sigurie ose që janë nën arrest shtëpiak nuk mund të votojnë në vendvotimin e tyre të caktuar, u mundësohet votimi përmes ekipeve mobile.
