Në prag të 16-vjetorit të Pavarësisë, Kosova mori të premten letra urimi.
Një të tillë e dërgoi presidenti i Shteteve të Bashkuara të Amerikës, Joe Biden.
Në letrën dërguar homologes së tij Vjosa Osmani, Biden ka potencuar se SHBA-ja është dhe mbetet një partnere e qëndrueshme e Kosovës.
Me këtë rast, ai potencoi rëndësinë e vazhdimit të dialogut për normalizimin e marrëdhënieve me Serbinë, teksa kërkoi nga Kosova që të përmbushë obligimet nga marrëveshjet e kaluara.
“SHBA-ja fuqishëm e mbështet një Kosovë multietnike dhe integrimin e saj në institucionet evropiane dhe euro-atlantike. Ne po ashtu vazhdojmë t’i mbështesim përpjekjet e dialogut të lehtësuara nga BE-ja për të arritur një marrëveshje normalizimi gjithëpërfshirëse me Serbinë – një hap i rëndësishëm përpara njohjes reciproke në fund (të procesit). Bashkë me vendet e rajonit dhe botës, SHBA-ja e inkurajon lidershipin e Kosovës që t’i përmbushë obligimet e saj, përfshirë të gjitha marrëveshjet e kaluara të arritura përmes këtij procesi”, thuhet në letrën uruese.
Letër uruese pati edhe nga Mbreti i Mbretërisë së Bashkuar, Charles III.
Përmes saj, ai vlerësoi lidhjen e shtetit të tij me Republikën e Kosovës.
“E vlerësoj lidhjen mes kombeve tona dhe shpresoj se vendet tona të mund të vazhdojnë të punojnë bashkë për çështje të rëndësishme globale, qofshin ato për paqe dhe prosperitet, apo mjedis dhe ndryshime klimatike, nga të cilat do të përfitojnë gjeneratat tona të ardhshme në vitet në vijim”.
Ndërsa presidenti i Republikës Federale të Gjermanisë, Frank-Walter Steinmeier, ndër të tjerash ka thënë se Gjermania do të mbetet një partner i besueshëm dhe i fuqishëm i Kosovës edhe në të ardhmen, ndërsa ka theksuar se do ta mbështesë vendin drejt një të ardhme paqësore, evropiane.
Me 17 shkurt 2008, në Kuvendin e Republikës së Kosovës, është shpallur Pavarësia e Kosovës në prani të shumë ambsadorëve dhe personazheve të larta ndërkombëtare dhe vendore.
