Nga 180 vende, Kosova u rendit në vendin e 73-të, në Indeksin e Perceptimit të Korrupsionit për vitin 2024.
Kosova mori 41 pikë, ku sipas Indeksit, llogaritja bëhet nga zero në 100, ku zero tregon nivelin më të lartë të korrupsionit.
Këto shifra, sipas shefit të ekzekutivit, u quajtën rezultate të luftës kundër krimit të organizuar dhe korrupsionit nga ana e Qeverisë.
Por, ka skepticizëm për këto merita që ekzekutivi dëshiron t’i përvetësojë.
“Është e kundërta, nuk është arritje e Qeverisë, por është dështim i prokurorisë dhe i sistemit të drejtësisë në trajtimin e rasteve të korrupsionit. Sepse kemi disa raste të iniciuara nga prokuroria në Gjykatë, dhe akoma nuk kemi ndonjë procedurë apo proces gjyqësor apo epilog gjyqësor të rasteve të korrupsionit të çështjeve madhore”, tha Anton Nrecaj nga Instituti Clard.
Meritë e Qeverisë, në vlerat pozitive në Indeks të Perceptimit të Korrupsionit, vlerësohet se do të ishte atëherë kur do të investohej në sistem të drejtësisë.
“Qeveria e ka barrën kryesore të krijimit të infrastrukturës fillimisht ligjore, pastaj të sigurimit të transparencës me qëllim të sigurimit të funksionimit normal dhe të një sistemi të pakorruptuar. Në qoftë se ia arrin një gjëje të tillë, natyrisht se i merr edhe meritat. Por, pa përjashtuar edhe akterët e tjerë, të cilët kanë dorë në forcimin e kësaj pozite, sado që nuk është e kënaqshme, janë edhe shoqëria civile, mediat, pa përjashtuar edhe rolin e partnerëve ndërkombëtar”, tha avokati Valdet Hoxha.
Sipas këtij Indeksi, Kosova është renditur në mesin e shtatë shteteve që në pesë vitet e fundit kanë përmirësuar shifrat për perceptim të korrupsionit.
