Përfaqësuesja e Kosovës në futboll ka arritur një sukses të madh duke u renditur në pozitën më të lartë ndonjëherë në historinë e saj në renditjen më të fundit të FIFA-s, që u publikua të enjten, më 18 shtator 2025.
Ky përparim i rëndësishëm erdhi pas dy ndeshjeve të zhvilluara në kuadër të kualifikimeve për Botërorin 2026, ku Kosova tregoi një formë të qëndrueshme dhe konkurruese.
Pas një fitoreje të rëndësishme në shtëpi ndaj Suedisë, në stadiumin “Fadil Vokrri” në Prishtinë, dhe një humbjenë udhëtim ndaj Zvicrës në Basel, kombëtarja kosovare arriti të ngjitet për tri pozita, duke u renditur tani në vendin e 91 në ranglistën globale.
Kjo përfaqëson një arritje historike për futbollin kosovar, që ka 1262 pikë në total, duke dëshmuar se puna dhe investimet në ekipin kombëtar po japin fryte.
Tashmë, vëmendja është e fokusuar te ndeshja e radhës më 10 tetor, kur Kosova do të presë Slloveninë në Prishtinë.
Në anën tjetër të renditjes globale, nuk ka ndryshime të mëdha në top 10. Spanja ka marrë kreun e renditjes, duke zënë vendin e parë, ndërsa Franca pozicionohet e dyta.
Kampionia aktuale Botërore, Argjentina, ka zbritur në vendin e tretë.
Në vazhdim vijnë Anglia në vendin e katërt, Portugalia në të pestin, Brazili në të gjashtin, Holanda në të shtatin, Belgjika në të tetin, Kroacia në të nëntin dhe Italia në të dhjetin.
