Sezoni sensacional i FC Thun po shkon drejt një epilogu historik. Klubi është shumë pranë titullit kampion në Zvicër, duke pasur nevojë për vetëm katër fitore në tetë ndeshjet e mbetura për ta siguruar matematikisht trofeun.
Në mesin e protagonistëve kryesorë të këtij suksesi janë dy talente vendase, por një emër po spikat veçanërisht: Valmir Matoshi. Futbollisti 22-vjeçar, i lindur në Thun dhe pjesë e klubit që nga mosha 11-vjeçare, është kthyer në një nga figurat kryesore të ekipit që po befason gjithë Zvicrën.
“Është e pabesueshme dhe vështirë të përshkruhet me fjalë”, është shprehur Matoshi pas fitores bindëse 5:1 ndaj Grasshopper Club Zürich. Për të, ky sukses ka një domethënie të veçantë, pasi ka kaluar më shumë se një dekadë brenda klubit.
Forma e shkëlqyer e Matoshit këtë sezon – me pesë gola dhe katër asistime – nuk ka kaluar pa u vënë re. Ai tashmë konsiderohet një opsion potencial për kombëtaren e Zvicrës, e drejtuar nga trajneri Murat Yakin, i cili pritet të shpallë listën për ndeshjet miqësore kundër Norvegjisë dhe Gjermanisë.
Megjithatë, deri më tani, nuk ka pasur asnjë kontakt. “Jo, nuk kam dëgjuar asgjë”, ka thënë Matoshi, duke lënë të hapur të ardhmen e tij ndërkombëtare. Me prejardhje nga prindër kosovarë, ai ka të drejtë të përfaqësojë edhe Kosovën, duke e kthyer këtë në një “garë” interesante mes dy federatave.
Nga ana tjetër, as Federata e Futbollit e Kosovës nuk ka bërë ende një lëvizje konkrete për ta bindur talentin e ri. Kjo situatë mund të ndryshojë shpejt, sidomos nëse Matoshi vazhdon me paraqitje të tilla mbresëlënëse.
Rruga e Matoshit drejt suksesit nuk është e rastësishme. Ai kishte rënë në sy që më herët, madje duke tërhequr interesimin e gjigantit italian Juventus që në kohën kur luante në ligën e dytë zvicerane.
Tani, me Thunin në prag të një titulli historik dhe me vëmendjen e kombëtareve mbi të, Valmir Matoshi ndodhet në një moment kyç të karrierës. Pyetja mbetet: a do të arrijë Kosova ta bindë dhe ta bëjë pjesë të projektit të saj, apo Zvicra do ta sigurojë një tjetër talent premtues?
