Të enjten deklaroi se janë në pritje të raportit nga Kosova për sulmin e 24 shtatorit në Banjskë.
Për të dalë në një konkluzion përfundimtar, zëdhënësi i Bashkimit Evropian, Peter Stano tha për Tëvë1 se raporti duhet trajtuar me kujdes.
E të premten, zëvendëskryeministri Besnik Bislimi bëri të ditur se raporti është dorëzuar.
Këtë e konfirmoi gjatë raportimit në Komisionin për Integrime Evropiane, teksa i kërkoi Prokurorisë publikimin e tij.
E mosngritja e aktakuzës nga ana e Prokurorisë për ish nënkryetarin e Listës Serbe, Milan Radoijçiq, nga Bislimi po shihet si mundësi për sulme të reja.
E njohësi i sigurisë, Bedri Elezi vlerëson se vetëm një raport nuk është i mjaftueshëm për ngritje të aktakuzës.
“Në rastin konkret e kemi kuptuar që është dërguar një raport, por nuk mendoj se është e mjaftueshme vetëm ky për të ngritur aktakuzë apo për të shkuar tutje. Neve e dimë që ka gjasa të jetë i përfshirë edhe një shtet tjetër në këtë rast, Serbia në agresion dhe sulme terroriste, prandaj për të qenë një aktakuzë e përgatitur me prova dhe argumente të dobishme, të nevojshme, mendoj që prokuroria me të drejt po zhvillon hetimet”, tha Elezi.
Elezi tutje shtoi se për t’u ngritur një aktakuzë duhen fakte të cilat janë duke u mbledhur nga terreni, e pastaj të ngritën edhe aktakuzat e bazuara.
Rreth deklaratave të kryenegociatorit Besnik Bislimi, Tëvë1 ka dërguar pyetje në Prokurorinë Speciale të Kosovës por deri në publikimin e kronikës, nuk ka pranuar përgjigje.
Kronikë e realizuar nga gazetari, Venhar Isufi.
