Përfaqësuesja e kosovës në futboll ka udhëtuar për në Bukuresht, pasi sonte do të ketë para vetes testin e radhës në kuadër të kualifikimeve për “Euro 2024”.
Dardanët me fillim nga ora 20:45, në “Arena Nationala” janë mysafirë të Rumanisë, kombëtare kjo që sikurse Kosova kërkon triumfin.
Sigurisht, kjo ndeshje për Kosovën është një finale në vete, pasi një fitore eventuale do të rriste gjasat për të kualifikim.
Ekipi dardan dje ka mbajtur edhe stërvitjen e fundit para ndeshjes, ndërsa mbrojtësi Mërgim Vojvoda dhe përzgjedhësi Primozh Gliha janë shprehur optimistë për këtë takim. Gliha thotë se pret rezultat pozitiv.
‘“Pres rezultat pozitiv dhe do të japim gjithçka për të arritur këtë. Luajmë kundër një ekipi që ka shumë lojtarë teknikë, por edhe ne kemi lojtarë të mirë dhe të luajnë në klube të mëdha. Jemi përgatitur mirë dhe ndihemi shumë mirë para kësaj ndeshje. Jam i bindur se do të jetë një lojë e shkëlqyeshme, sepse të dyja ekipet kemi nevojë për pikë”, u shpreh Gliha.
Ai barazim ndaj Zvicrës 2-2 në minutën e fundit, ka ngritur moralin tek ekipi i Kosovës, ose të paktën kështu pretendon Vojvoda, i cili thotë se nuk është problem edhe pse luajnë si mysafir në këtë ndeshje.
“Mjafton ta shihni këtë logo në zemrën tonë, është flamuri i Kosovës dhe ne e përfaqësojmë këtë shtet dhe askënd tjetër. Ne jemi Kosova. Jemi të lindur nga lufta dhe do të bëhemi më të fortë se guri”, tha Vojvoda.
Rumunët aktualisht janë në pozitën e dytë në Grupin I, me 9 pikë, derisa Kosova është në kuotën e 4 pikëve. Para kësaj përballje të dyja ekipet barazuan si vendase; Rumania kundër Izraelit (1:1), derisa Kosova kundër Zvicrës (2:2).
