Të martën, është mbajtur konferenca e parë sportive së bashku me Federatën Shqiptare të Basketbollit, Federatën e Basketbollit të Kosovës dhe Fakultetin e Edukimit Fizik dhe Sportit, në të cilën u diskutua për rolin dhe mundësitë e shtrirjes së bashkëpunimi më të thellë të Kosovës dhe Shqipërisë në fushën e sportit.
Liga Unike e basketbollit është hapi i parë që është bërë ndërmjet këtyre dy vendeve dhe kjo garë po shihet si derë e mirë edhe për bashkëpunim në sporte të tjera.
Kreu I FSHB-së, Avni Ponari theksoi se në fillimet e tyre kishin hasur vështirësi për ta organizuar Ligën Unike, por kjo pastaj u shndërruar në një ngjarje shumë të rëndësishme duke hyrë edhe në kalendarin e FIBA-s.
Bashkëpunimi ndërmjet Prishtinës dhe Tiranës, sipas Kryetarit të Komunës së Prishtinës, Përparim Rama, është shumë i ngushtë, por mund të rritet edhe më shumë në fushën e sportit dhe jo vetëm.
Kreu i FBK-së, Arben Fetahu vuri në pah nevojën e madhe që kanë federatat për të bërë organizime të tilla.
Ndërkohë, mbështetjen logjistike dhe financiare për federatat sportive e garantoi presidenti i Komitetit Olimpik të Kosovës, Ismet Krasniqi.
Më 26 dhe 27 mars, në Pallatin e Rinisë dhe Sportit në Prishtinë, do të mbahet “Final 4” i Ligës Unike në konkurrencën e meshkujve.
