Të rralla janë rastet kur sportistët e Kosovës përballen me ata të Serbisë. Ndërsa, edhe më rrallë ndodhë të paraqiten së bashku në podiumin.
Mirëpo, ndryshe ishte këtë fundjavë në Budvë të Malit të Zi.
Karateistet e Kosovës dhe ato të Serbisë e fituan vendin e tretë në Kampionatin Ballkanik për seniorë dhe veteranë, që përfundoi të dielën.
Në konkurrencë ekipore, karateistet e Kosovës fituan medalje të bronztë, ndërsa gjatë pranimit të medaljeve ishin në podium së bashku me karateistet e Serbisë. Edhe ekipi përfaqësues i Serbisë u rendit i treti.
Vendin e parë e fitoi përfaqësuesja e Bosnjë-Hercegovinës, kurse të dytin Maqedonia e Veriut.
Kosova në garën ekipore u përfaqësua nga Vlerë Qerimi, Fortesa Orana, Behije Mustafa dhe Elmedina Istogu.
Kosova nisi me fitore 2:0 ndaj Malit të Zi. Më pas u mposht 2:0 nga Maqedonia e Veriut. Në repesazh, karateistet kosovare fituan 2:1 ndaj Rumanisë.
Serbia fillimisht humbi 2:1 nga Bosnjë-Hercegovina e më pas fitoi ndaj Kroacisë.
