Nga Shtetet e Bashkuara të Amerikës, erdhi në Prishtinë.
ZëvendësNdihmës sekretari amerikan i Mbrojtjes, David. A Baker vizitën e tij e nisi në takim me të parën e shtetit, Vjosa Osmani.
Të shtunën, Baker u prit nga shefja e shtetit me të cilën diskutuan për mundësinë e bashkëpunimit edhe më të madh për anëtarësimin e Kosovës në NATO dhe ruajtjen e paqes dhe sigurisë në rajon.
“Presidentja Osmani theksoi se Kosova po ndërton një forcë moderne të sigurisë sipas standardeve të NATO-s dhe se partneriteti me SHBA-në është thelbësor për paqen dhe stabilitetin në rajon. Në këtë kuadër, Presidentja Osmani nënvizoi se anëtarësimi i Kosovës në NATO është jo vetëm synim strategjik i shtetit, por një domosdoshmëri për arkitekturën e sigurisë në rajon”, thuhet nga Presidenca.
Sipas Osmanit, kur Shtetet e Bashkuara të Amerikës qëndrojnë përkrah Kosovës, Kosova është më e fortë, e sigurt dhe e zhvilluar.
Pas takimit me shefen e shtetit, zyrtari amerikan, Baker u prit me nderime të larta nga ministri në detyrë i Mbrojtjes, Ejup Maqedonci.
Më pas u zhvillua edhe takim tet-a-tetë.
Se çfarë u diskutua aty, tregoi vetë Maqedonci.
“Konfirmuam partneritetin mes dy vendeve tona ndërsa theksova angazhimin tonë për ta forcuar edhe më tej këtë bashkëpunim. Me Shtetet e Bashkuara si partnerin tonë të besueshëm, Kosova gëzon një siguri të shtuar dhe luan një rol të rëndësishëm në promovimin e paqes dhe stabilitetit, si në nivelin rajonal ashtu edhe në atë global. Ne jemi të përkushtuar për të avancuar këtë partneritet në nivele edhe më të larta!”, ka shkruar Maqedonci
Në anën tjetër, zëdhënësi i Qeverisë në detyrë, Përparim Kryeziu tha për Tëvë1 se kryeministri në detyrë, Albin Kurti do të ketë një darkë pune me Baker, të organizuar nga ministri Maqedonci.
Zëvendësndihmëssekretari amerikan për Mbrojtje, Politika Evropiane dhe NATO-n, takim kishte edhe me komandantin e misionit KFOR, gjeneralmajor Enrico Berduani.
Në njoftimin e KFOR-it thuhet se takimi ishte një “mundësi e jashtëzakonshme për të ndarë pikëpamje mbi situatën e sigurisë në Kosovë dhe mbi rrugën përpara për të mbështetur më së miri një angazhim të ripërtërirë politik për dialogun midis Prishtinës dhe Beogradit”.
Baker thuhet se rikonfirmoi angazhimin e palëkundur të SHBA-së në misionin e KFOR-it në Kosovë, siç thuhet, duke theksuar mbështetjen e vazhdueshme për sigurinë dhe stabilitetin rajonal.
