Por shumë shpejt Kosova do ta bëj hapin e parë drejt integrimit në bashkësinë e shteteve evropiane.
Në një përgjigje me shkrim për tëvë1, Klisman Kadiu, këshilltar i zv.kryeministrit Besnik Bislimi, ka bërë të ditur se aplikimi do të bëhet muajin e ardhshëm.
Si Qeveri, kemi filluar përgatitjet për ta dorëzuar aplikimin për anëtarësim në Bashkimin Evropian, si hap i parë, e me synim marrjen e statusit të vendit kandidat. Aplikimi do të dorëzohet këtë vit, brenda muajit dhjetor.
Njohës të integrimeve evropiane vlerësojnë se është në të drejtën e Kosovës të aplikojë për anëtarësim në BE, megjithëse kjo mund të ketë efekte negative.
“Kosova ka avancuar në shumë dimensione, megjithatë ne duhet ta pranojmë që në plot aspekte duhet që të avancohet edhe më tutje, si në aspektin e legjislacionit, por sidomos kur vjen puna te zbatimi i tij – nuk është me rëndësi a është e shkruar drejta e njeriut në një letër por sa zbatohet ajo”, tha Valon Murtezaj, ish-zv.ministër i Punëve të Jashtme.
Kurse, Arbër Fetahu, hulumtues në GLPS thotë se dërgimi i aplikacionit mund të shërbej për mirë në dinamizmin e reformave evropiane.
“Mendoj që dërgimi i aplikacionit mund të shërbej për mirë në dinamizmin e reformave evropiane por nëse nuk marrim ndonjë mbështetje publike nga vendet e BE-së kjo mund të kthehet në bumerang në aspektin ndërkombëtar të Kosovës sepse i bie që po aplikojmë vetëm sa për sy e faqe”, tha ai.
Kosova ka hyrë në marrëdhënie kontraktuale me BE-në në tetor të vitit 2015, pasi që kishte nënshkruar Marrëveshjen e Stabilizim-Asociimit.
Kronikë e realizuar nga Gojart Jashari.
