Ministri i Kulturës, Hajrullah Çeku ka bërë të ditur se marrëveshja përkatëse mes dy shteteve do të nënshkruhet gjatë Festivalit të Kanës në pjesën e dytë të muajit maj.
Çeku në Facebook tha se është tejet i gëzuar për këtë bashkëpunim kinematografik me partnerët francez.
“Marrëveshja përkatëse mes dy shteteve tona do të nënshkruhet gjatë Festivalit të Kanës në pjesën e dytë të muajit Maj. Kjo marrëveshje u ofron mundësi dhe mbështetje shtesë filmbërësve të Kosovës për bashkëpunime kinematografike me partnerët francezë”, ka shkruar ai.
Tutje ministri shprehu mirënjohje për zyrtarët e Ambasadës së Francës në Kosovë, sa i përket angazhimit të tyre për jetësimin e kësaj marrëveshje.
“Dua të shpreh mirënjohjen time të thellë për zyrtarët e Ambasadës së Francës në Kosovë, duke filluar nga ambasadorja Marie-Christine Butel, këshilltari për kulturë Donato Giuliani, dhe atasheu për kulturë Valon Ibraj. Angazhimi i tyre këmbëngulës ka qenë vendimtar për jetësimin e kësaj marrëveshje bilaterale”, tha Çeku./teve1.info/
