Ministri në detyrë i Punëve të Brendshme, Xhelal Sveçla, ka bërë të ditur se gjatë vizitës së tij zyrtare në Londër është takuar me Drejtorin e Përgjithshëm të Agjencisë Kombëtare të Krimit të Mbretërisë së Bashkuar (NCA), Graeme Biggar.
Sipas Sveçlës, gjatë takimit është diskutuar rreth bashkëpunimit të ndërsjellë në luftën kundër krimit të organizuar, trafikimit të qenieve njerëzore, financimit të terrorizmit, si dhe kërcënimeve të tjera që rrezikojnë sigurinë e përbashkët.
Ai gjithashtu ka bërë të ditur se me zotin Biggar janë dakorduar për intensifikimin e bashkëpunimit ndërinstitucional, shkëmbimin e informacioneve dhe ndërtimin e kapaciteteve profesionale në fushën e sigurisë.
“Republika e Kosovës mbetet e përkushtuar për të qenë partner i besueshëm në arenën ndërkombëtare të sigurisë dhe për të ndërtuar institucione të forta, të qëndrueshme dhe profesionale në bashkëpunim me aleatët tanë”, ka shkruar Sveçla në Facebook./teve1.info/
