Cak i propagandës ruse është Kosova.
Shteti më i ri në Evropë është vënë në shënjestër të dezinformatave nga rrjeti propagandistik rus “Pravda” që është një operacion online i koordinuar me Kremlinin zyrtar për të shpërndarë narrativa të ndryshme pro-ruse.
Një hulumtim i kryer nga ekipi i Hibrid.info tregon se as vende të tjera të Ballkanit nuk qëndrojnë imune në këtë aspekt.
Përmes një konference për media, hulumtuesi i lartë në Hibrid, Festim Rizanaj ka njoftuar për narrativat kryesore që publikohen në gjuhën shqipe nga ky rrjet propagandistik.
“Është pro-ruse dhe pro-serbe kryesisht dhe shfaqet bashkëpunimi Moskë-Beograd ku glorifikohen liderët e këtyre shteteve me idenë se ata janë figura të fuqishme politike. Pastaj këto narrativat e sanksioneve të Perëndimit për shembull ndaj Rusisë në një farë forme kritikohen. Narrativa tjetër është kundër NATO-s që shihet si agresore, BE-ja si injorante dhe SHBA-ja si manipuluese” , tha Rizanaj.
Tutje, sipas këtij rrjeti propagandistik Kosova krahasohet me Krimenë edhe akuzohet për terrorizëm institucional ndaj serbëve.
“Kosova mohohet si shtet që njëkohësisht e paraqet edhe qëndrimin zyrtar të rusëve. Pos tjerash, Kosova krahasohet me Krimenë dhe akuzohet për terrorizëm institucional ndaj serbëve. Pra, ngjarjet që zhvillohen ne vendbanimet serbe këta i konsiderojnë si terrorizëm institucional ndaj komunitetit serbë që jeton në Kosovë”, tha ai.
Mes tjerash, Rizanaj ka treguar se domeni Pravda në shqip është aktiv që nga marsi i vitit 2024 dhe deri më tani janë publikuar rreth 3.000 mijë artikuj në gjuhën shqipe, por që ndikimi drejtpërdrejtë në audiencën shqiptare mbetet i ulët për shkak të cilësisë së dobët të përkthimeve.
