Përkundër paraqitjes së mirë, Kombëtarja e Kosovës në futboll ka pësuar humbje në ndeshjen e dytë miqësore të këtij muaji.
Të martën mbrëma, Kosova u mposht nga Hungaria me shifrat 2:0 në duelin e luajtur në stadiumin “Puskas Arena” në Budapest.
Për Kosovën, kjo ishte miqësorja e dytë dhe e fundit për këtë muaj. Të premten e shkuar, Kosova e mposhti 1:0 Armeninë në Yerevan por nuk arriti të marrë rezultat pozitiv edhe ndaj Hungarisë, ekip që do të paraqitet në Kampionatin Evropian që mbahet këtë verë në Gjermani.
Në fakt, Kosova luajti shumë mirë, sidomos në pjesën e parë, në të cilën dominoi tërësisht. Pavarësisht, dominimit të plotë, Kosova nuk arriti të shënoj gol dhe pjesa e parë përfundoi me rezultatin 0:0.
Madje, gjatë 45 minutave të para, Kosova pati ca raste të mira shënimi, ku duhet veçuar tentimin e Edon Zhegrovës. Zhegrova që edhe ishte lojtari më i dalluar në fushë, gati sa nuk shënoi gol në minutën e 9-të. Por, gjuajtja e tij u devijua dhe përfundoi jashtë.
Edhe në pjesën e dytë, Kosova tentoi për ta zhbllokuar rezultatin dhe kur pritej goli i “Dardanëve” ishte Hungaria, ajo që realizoi në minutën e 58-të. Pas një gabimi para portës, kapiteni i Hungarisë, Dominic Szoboslzai shënoi nga afërsia dhe atë me ndihmën e kapitenit Amir Rrahmani.
Hungarezët e shënuan edhe golin e dytë, duke e vulosur rezultatin përfundimtar të takimit. Në minutën e 86-të, mbrojtësi Zsolt Nagy shënoi nga afërsia për t’i dhënë fund dilemës së fituesit.
Për përzgjedhësin e Kosovës, Franco Foda kjo ishte ndeshja e dytë në krye të Kosovës dhe humbja e tij e parë me “Dardanët”.
Për dallim prej ndeshjes me Armeninë, selektori Foda kundër Hungarisë bëri tri ndryshime në formacion. Kapiteni Amir Rrahmani u rikthye në mbrojtje nga lëndimi në vend të Lumbardh Dellovës, Donat Rrudhani e zëvendësoi në krahun e majtë të mbrojtjes Leart Paqaradën e lënduar, ndërsa në mesfushë Blendi Idrizi startoi para Florian Loshajt.
Dy miqësoret e radhës, Kosova do t’i këtë në muajin qershor por ende nuk e ka caktuar kundërshtarin e dytë. Tani për tani, vetëm dueli me Norvegjinë në Oslo është i konfirmuar.
Në shtator, Kosova do të paraqitet në Grupin 2 të Ligës C të Ligës së Kombeve, ku do të përballet me Lituaninë, Rumaninë e Qipron.
