Koreografi Robert Nuha në emisionin “Info Nata” në Tëvë1, tha se gjëja më shqetësuese e gjithë kësaj është deklarata e ministrit të Kulturës, Hajrullah Çekut, ku ky i fundit ka thënë se në Kosovë nuk ka kuadro me shkollim të lartë në fushën e koreografisë.
Nuha thotë se deklarata e Çekut është fyese për ta dhe demotivuese për gjeneratat e reja.
“Gjëja më shqetësuese në fakt janë deklaratat sepse jemi një grup koreografësh të cilët jemi dëshmuar edhe me punë edhe me shkollim duke qenë se të gjithë jemi 12 koreografë të cilët jemi shkolluar në Akademinë e Arteve në Tiranë dhe të gjithë veprojmë në institucionet të ndryshme publike apo private në Kosovë me ato diploma dhe në fund e sheh një ministër që me gjithë respektin e pozicionit të tij, del me një deklaratë që për neve është fyese dhe është demotivuese shumë për gjeneratat e reja. E sidomos për gjeneratat e reja që ne i kemi në mbikëqyrje si mentor të tyre të cilët i shtyjmë për ditë dhe i inspirojmë me gjithë vështirësitë që ne i kemi”, ka thënë ai.
Ai paraqiti shqetësimin për arsyet e deklaratës së ministrit Çeku.
“Shqetësimi më i madh për mua dhe gjithë kolegët të cilët kemi mbështetjen e plotë e gjithë kerografëve për të ngritur shqetësimet e tona se ministri me çfarë arsye thotë se në Kosovë nuk ka kuadro”, tha ai.
Ndërsa, koreografi Driton Saqiri tha se pret nga ministri Hajrullah Çeku që të kërkojë falje publike apo të tregojë qëllimin e deklaratës së tij se “në Kosovë nuk ka kuadro me shkollim të lartë në fushën e koreografisë”.
“Ministri na njeh personalisht dhe e njeh punën tonë që ne e bëjmë në Kosovë, mua personalisht me njeh dhe Robertin e njeh dhe e ka përcjellur edhe shfaqjen e tij, prandaj ne si grup i kerografëve presim një deklaratë nga ministri ose të kërkojë falje publike ose të tregojë qëllimin e asaj deklarate se ku ka dashur të dal me atë deklaratë”, ka thënë Saqiri. /teve1.info/
