Kandidati për deputet nga Lista për Familjen, Visar Korenica, ka deklaruar se lista e tij ka gjetur bashkëpunim me Partinë Demokratike të Kosovës falë përputhjes së qëllimeve programore dhe gatishmërisë për t’i ofruar vendet e nevojshme për përfaqësim.
Ai theksoi se lista përbëhet nga 7 kandidatë të përgatitur profesionalisht, të cilët kontribuojnë në hartimin e një programi që synon të sjellë zgjidhje konkrete për pagat, pensionet dhe përkujdesjen shëndetësore për qytetarët e Kosovës.
“Arsyeja pse kemi gjetur bashkëpunim me PDK-në është që edhe në Listën e plotë na u kanë ofruar vendet e nevojshme për çfarë ne përfaqësohemi prej 7 kandidatëve, secili më i përgatitur se tjetri nga ana profesionale, jemi pjesë e përbashkët e një ndërtimi të programit që ka me qenë i favorshëm për qytetarët e Kosovës ku do të ketë zgjidhje konkrete për pagat, për pensionet, zgjidhje konkrete për ata të cilët kanë nevojë që të ndjejnë dorën e shtetit sa i përket shëndetit të tyre”, ka deklaruar Korenica në emisionin “Ditari” në Tëvë1.
Ai shtoi se PDK preferon koalicion me partitë opozitare, ndonëse nuk e përjashton një marrëveshje të mundshme me Lëvizjen Vetëvendosje, varësisht nga zhvillimet politike.
“Si Parti Demokratike e Kosovës, preferojmë që të lidhim koalicion me partitë që janë në opozitë dhe jo me Lëvizjen Vetëvendosje, por që nuk përjashtohet ndonjë koalicion me Lëvizjen do të shohim më vonë si do të rrjedhë situata. Ne vija të kuqe për PDK-në kemi pasur që të pranojë kauzat tona. Ne mendojmë që do ta tejkalojmë rezultatin e 9 shkurtit, po flas për një rezultat më të mirë se siç ka qenë dhe sigurisht ky rezultat do të rezultojë si pasojë e largimit nga një gjuhë përçarëse dhe largimit të mbështetjes së ministrave apo akterëve qeveritar. Kryeministri i ardhshëm do të jetë Bedri Hamza pa asnjë dyshim, Kosovës i duhet një kryeministër i cili bashkon e nuk largon”, u shpreh ai ndër të tjera.
Në fund, ai u shpreh i bindur se Bedri Hamza do të jetë kryeministri i ardhshëm i Kosovës./teve1.info/
