Janë arrestuar dhe ndaluar për 48 orë në Ferizaj të dyshuarit me inicialet: K.Gj., E.Gj., Q.Sh., M.Sh. dhe E.I., me dyshimin se kanë kontrabanduar dhe shitur mjaltë me përmbajtje të substancave të dëmshme për shëndetin, raporton teve1.info
Sipas një komunikate të Prokurorisë së Ferizajt, të dyshuarit që nga muaji mars 2023 e tutje kanë futur në vazhdimësi mjaltë të kontrabanduar përmes pikës kufitare me Malin e Zi, duke e shmangur kontrollin doganor dhe atë të Agjencisë së Ushqimit dhe Veterinarisë.
Po ashtu, të dyshuarit, mjaltin e kontrabanduar e kanë plasuar në shitje në Ferizaj dhe pejsë tjera të Kosovës duke qenë të vetëdijshëm se mjalti i kontrabanduar nuk i plotëson kushtet e nevojshme për konsum dhe se përmban substanca të dëmshme për shëndetin dhe paraqet rrezik të madh për shëndetin e qytetarëve të cilët e blejnë këtë produkt.
Sipas Prokurorisë, me këto veprime, të arrestuarit dyshohen për veprat penale: “Kontrabandimi i mallrave”, “Prodhimi dhe vënia në qarkullim e artikujve të dëmshëm ushqimorë” dhe “Mashtrimi i blerësve”.
“Sipas Prokurorisë, ekziston dyshimi i arsyeshëm se të pandehurit nga marsi i vitit 2023 e në vazhdimësi edhe tani, përmes pikës kufitare që lidh Kosovën me Maqedoninë e Veriut, të pandehurit, kalojnë vijën kufitare duke bartur mallra dhe shmangin kontrollin doganorë, ashtu që me mjete të ndryshme të transportit duke shfrytëzuar rrugët ilegale nëpër rrugë malore dhe rrugë të tjera kontrabandojnë mallra të emëruara si “mjaltë” me origjinë nga vende të ndryshme, e cila futet në paketime të ndryshme dhe në kavanoz dhe këto mallra futen në Kosovë duke i’u shmangur kontrollit doganorë dhe kontrolleve sanitare nga AUV në lidhje me cilësinë e këtyre produkteve, me ç’ rast Doganës së Kosovës i shkaktojnë dëm të konsiderueshëm material, me këtë ekziston dyshimi i arsyeshëm që secili veç e veç ka kryer veprën penale “Kontrabandimi i mallrave” nga neni 311 paragrafi 1, të Kodit Penal të Republikës së Kosovës”, thuhet në komunikatë.
Sipas Prokurorisë, të dyshuarit kanë kryer edhe veprën penale “Prodhimi dhe vënia në qarkullim e artikujve të dëmshëm ushqimorë”, sipas Kodit Penal të Republikës së Kosovës.
“Të njëjtit, gjatë periudhës kohore të lartëcekur, në Ferizaj dhe në vende të ndryshme nëpër Kosovë, mallin e kontrabanduar e vënë në qarkullim për shitje pa u bërë kontrolli i nevojshëm nga enti i autorizuar- AUV në Kosovë, duke e plasuar nëpër lokale të ndryshme nëpër Ferizaj dhe nëpër vende të tjera në Kosovë duke qenë të vetëdijshëm se mjalti i kontrabanduar nuk i plotëson kushtet e nevojshme për konsum dhe se përmban substanca të dëmshme për shëndetin dhe paraqet rrezik të madh për shëndetin e qytetarëve të cilët e blenë këtë produkt, me këtë ekziston dyshimi i arsyeshëm që secili veç e veç ka kryer veprën penale “Prodhimi dhe vënia në qarkullim e artikujve të dëmshëm ushqimorë” nga neni 261 1 dhe 2, të Kodit Penal të Republikës së Kosovës”, thuhet në njoftim.
Si dhe, pesë të arrestuarit dyshohen edhe për veprën penale “Mashtrim i blerësve”.
“Po ashtu, të njëjtit, gjatë kësaj periudhe, në Ferizaj dhe në vende të ndryshme nëpër Kosovë, me dashje dhe me qëllim të mashtrimit të blerësve vënë në qarkullim prodhime me shenjën në të cilën janë të shënuara të dhëna të cilat nuk i përgjigjen përmbajtjes, llojit, prejardhjes dhe kualitetit të produktit, me këtë ekziston dyshimi i arsyeshëm që secili veç e veç ka kryer veprën penale “Mashtrimi i blerësve” nga neni 293 paragrafi 1, të Kodit Penal të Republikës së Kosovës”, thuhet në komunikatën e Prokurorisë.