Deputetja e Mbretërisë së Bashkuar, Alicia Kearns tha se sot se në veri të Kosovës kontrabandohen armë që vijnë nga Serbia, dhe sipas saj, kjo bëhej me anë të ambulancave.
Portali “The Geopost” ka publikuar videon për të cilën thotë se është xhiruar në veri të Mitrovicës e ku shihen persona të maskuar duke marrë armë nga ambulanca.
“Ambulanca serbe në veri të Kosovës bartë armë ditën kur u bombardua një ndërtesë zgjedhore në Mitrovicë. Në video shfaqen edhe anëtarët e ‘Mbrojtjes Civile’ , të udhëhequr nga i burgosuri tashmë i ndaluar i njohur si Lune”, thuhet në përshkrimin e Geopost.
Kearns në Parlamentin e Britanisë së Madhe, ka thënë se Qeveria e Britanisë është informuar nga KFOR-i se në veri të Kosovës kontrabandohen armë që vijnë nga Serbia, dhe sipas saj, ato ruhen në kishat ortodokse serbe.
“Kjo është arsyeja pse fotografia e sigurisë është kaq e rëndë. Për një kohë të gjatë nuk kemi arritur t’i ndalim milicitë e armatosura serbe që veprojnë në veri të Kosovës. Qeveria është e vetëdijshme, me Fusilierët që sapo janë kthyer nga shërbimi në KFOR, se ka armë që kontrabandohen përtej kufirit nga Serbia në kishat ortodokse me ambulanca. Kur trupat tona bëhen të vetëdijshme për këtë dhe përpiqen të marrin leje për të shkuar dhe për t’i marrë ato, lejet zgjasin shumë. Deri në momentin që ka leje – të papritura – një ambulancë është paraqitur në kishë dhe ka nxjerrë përsëri të gjitha armët”, ka thënë Kearns.
