Përderisa në Hagë ka filluar java e dytë e gjykimit ndaj ish-krerëve të Ushtrisë Çlirimtare të Kosovës, në vendin tonë po konsiderohet se shteti nuk ka dhënë fare kontribut në mbledhjen e provave që dëshmojnë pafajësi.
Ndonëse lufta e UÇK-së ishte e drejtë dhe e pastër, sipas avokatit Skënder Musa, vendi ka dështuar të përmbush obligimin.
“Shteti i Kosovës nuk ka bë asgjë. Nuk e ka siguruar asnjë provë, nuk ka punuar në sigurimin e provave fare. Të vetmen punë që e ka bë qeveria e Kosovës për ish drejtuesit e drejtorisë politike të UÇK-së, është pagesa e avokatëve. Qeveria e Kosovës nuk ka bërë, po shihet se nuk po bën diçka, apo do të bëj ndonjë ndihmë eventuale lidhur me ofrimin e provave që të mbrohet UÇK-ja e lufta jonë e drejtë”, ka thënë Musa.
Edhe sipas profesorit të së drejtës penale, Ismet Salihu, shteti kosovar është duke qëndruar duarlidhur në këtë drejtim.
“Qeveria akoma edhe sot e kësaj ditë nuk e ka bërë. Nëse vjen ndonjë zyrtar apo hulumtues në nivel nacional e të kërkojë numrin e të vrarëve, të plagosurve, të shkatërrimeve, evidenca tjera, nuk ka”, thotë Salihu.
Në javën e kaluar ka nisur gjykimi ndaj ish-krerëve të UÇK-së, Thaçi, Veseli, Krasniqi e Selimi, ku Zyra e Prokurorit të Specializuar paraqiti provat kundër tyre, teksa edhe mbrojtja kishte fjalën hyrëse.
Kronika e realizuar nga gazetarja Valëza Sylejmani
