Kryetari i Kuvendit të Republikës së Kosovës, Glauk Konjufca, gjatë qëndrimit në Estoni, përveç takimeve zyrtare me krerët shtetërorë, ka vizituar sot Qendrën e-Estonia dhe NATO Cooperatice Cyber Defence Centre of Exellence.
Sipas komunikatës për medie, Konjufca u njoh me rëndësinë e mbrojtjes nga sulmet kibernetike, si një rrezik i sigurisë kombëtare të shteteve i cili po rritet gjithnjë e më shumë.
Sipas njoftimit, ai vlerësoi se për rrjedhojë avancimi i digjitalizimit dhe siguria kibernetike duhet të zhvillohen përkrah njëra-tjetrës, përderisa Estoninë e konsideroi shembull lider të transformimit digjital të qeverisjes dhe shërbimeve publike, nga përvoja e të cilës mund të përfitojë Kosova.
“Digjitalizimi i qeverisjes është një orientim në funksion të rritjes së cilësisë shërbimeve publike të cilin duhet ta ndjekë edhe Kosova. Të rinjtë e Kosovës të shquar për prirjen e tyre në fushat e teknologjisë duhet t’i orientojmë edhe kah ky aspekt i sigurisë i cili do të jetë krucial për sigurinë tonë kombëtare në të ardhmen”, vlerësoi kryetari Glauk Konjufca, thuhet në komunikatë.
