Kryetari i Kuvendit, Glauk Konjufca, ka takuar kryetaren e Asamblesë Kombëtare të Francës si dhe disa përfaqësues tjerë institucionesh me të cilët ka diskutuar për integrimin e Kosovës në BE, raporton teve1.info
Përmes një statusi në Facebook, Konjufca ka thënë se në këtë takim është diskutuar edhe për thellimin e bashkëpunimit në mes të dy vendeve.
“Homologen time, znj. Yaël Braun-Pivet e falënderova për kontributin e Francës në drejtim të Kosovës ndër vite, asistencën e vyer që vendit tonë i ka sjellë sot sukses në cilësitë e shtetndërtimit, në sundim të ligjit dhe demokratizimin shembullor në rajon. Arritjet e shtetit tonë janë edhe suksese të aleatëve tanë që na kanë mbështetur dhe kanë dhënë kontributin e tyre, e ndaj të cilëve ne jemi mirënjohës.
Diskutuam për situatën aktuale në vendet tona dhe për sfidat nëpër të cilat gjendemi aktualisht. I theksova zj. Yaël Braun-Pivet përkushtimin e plotë të Republikës së Kosovës ndaj angazhimeve tona që në vëmendje kanë shembullin, mjetet dhe frymën e Bashkimit Evropian, unionit të vlerave dhe qëllimeve tona të përbashkëta”, ka shkruar Konjufca.