Kryetari i Kuvendit të Kosovës, Glauk Konjufca sot ka pritur në takim ambasadorin jorezident të Arabisë Saudite për Kosovë, Faisal Hifzi Ghazi.
Në njoftimin e Kuvendit, thuhet se gjatë takimit u bisedua për marrëdhëniet dhe bashkëpunimin ndërmjet Kosovës dhe Arabisë Saudite, si dhe përkushtimin e përbashkët në funksion të forcimit të mëtejshëm të raporteve dypalëshe.
“Duke vlerësuar këto marrëdhënie të mira, kryetari Konjufca dhe ambasadori Faisal Hifzi Ghazi u pajtuan se ekziston një potencial i konsiderueshëm i bashkëpunimit në fusha të ndryshme të interesit të përbashkët, që duhet të lëvrohet sa më shumë në të ardhmen”, thuhet në njoftim.
Ndryshe, ambasadori e ka falënderuar Konjufcën për pritjen, ku ritheksoi gatishmërinë e Arabisë Saudite për zgjerimin e bashkëpunimit dhe avancimin e marrëdhënieve me Kosovën.
Nga ana tjetër, Konjufca e falënderoi ambasadorin për vizitën e tij në Kosovë dhe diskutimin e frytshëm./teve1.info/
