Kryetari i Kuvendit të Republikës së Kosovës, Glauk Konjufca, në kuadër të vizitës zyrtare në Estoni, ka zhvilluar një takim me Kryetarin e Komitetit të Mbrojtjes Nacionale të Kuvendit të Estonisë, Kalev Stoicescu, më të cilin ka diskutuar lidhur me çështjet e sigurisë në të dy vendet respektive dhe në të gjithë kontinentin.
Sipas një komunikate për medie të Kuvendit të Kosovës, Konjufca e njohu kryetarin Stoicescu për përparimin e institucioneve tona të sigurisë në raport me rreziqet hibride ruse, por edhe qasjen agresive të shteti serb karshi sovranitetit të Republikës së Kosovës.
Kreu i Kuvendit kërkoi nga z. Stoicescu mbështetje sa i përket avancimit të kuadrit legjislativ në fushën e mbrojtjes, duke ditur se kontekstet e sigurisë po ndryshojnë në mënyrë kaq të shpejtë.
Bashkëbiseduesit ndanë mendimin e përbashkët lidhur me perspektivën e qartë të thellimit të bashkëpunimit midis Kosovës dhe Estonisë.
