Kryetari i Kuvendit të Kosovës, Glauk Konjufca, sot ka shkuar për ngushëllim te familja Thaçi pas vdekjes së babait të presidentit, Hashim Thaçi.
Ai për Tëvë1 tha se Haxhi të gjithë e kemi njohur si një patriot të madh e plak të urtë.
Ai gjithashtu ka përmendur rolin e Hashim Thaçit në periudhën e vështirë të vitit 1990, në luftën për liri dhe sot në Hagë, përcjell Telegrafi.
“Edhe gjatë viteve ’90 prej lëvizjes studentore, pastaj në krye të Ushtrisë Çlirimtare të Kosovës (UÇK) bashkë me veprimtarët e tij po e mbrojnë kauzën edhe në Hagë me bazin Jakup, me Rexhep Selimin me kryetarin Kadri Veseli kanë qenë në krye të UÇK e cila fal luftës së lavdishme e cila solli lirinë, pastaj edhe shpalljen e pavarësisë edhe në të gjitha proceset më të rëndësishme të Kosovës. Kjo nuk do të ndodhte pa dyshim pa inspirimin dhe pa frymëzimin që e kemi prej prindërve tanë ashtu siç presidenti Thaçi e ka pas padyshim prej bacit Haxhi. U kujtoft gjithmonë, i lehtë i qoftë dheu i Kosovës e u preft në paqe”, ka thënë Konjufca.
Haxhi Thaçi është varrosur të martën në fshatin Burojë të Skenderajt, në prani në një numri të madh të qytetarëve nga të gjitha trevat ku jetojnë shqiptarët.
Në ceremoninë e varrimit të Haxhi Thaçit morën pjesë personalitete të njohura politike e ish-pjesëtarë të UÇK-së, por jo edhe ish-presidenti Thaçi, i cili ndodhet në paraburgim në Hagë.
