Kryetari i Kuvendit të Kosovës, Glauk Konjufca ka thënë se Kosova po bënë veprime të shumta e po merr masa të vazhdueshme për ta luftuar pabarazinë.
Por, përkundër disa masave të ndërmarra siç është miratimi i Konventën e Stambollit dhe Strategjisë Kombëtare për Mbrojtje nga Dhuna në Familje dhe Dhuna ndaj Grave, Konjufca ka thënë se rastet e dhunës në familje nuk kanë pasur rënie të lartë.
“Përkundër të gjitha masave ligjore dhe institucionale, edhe plot fushatave të tjera vetëdijësuese, progresi është shumë i ngadalshëm, kurse rastet e dhunës në familje nuk kanë pësuar ndonjë rënie domethënëse. Prandaj nevojitet edhe më shumë përpjekje, edhe më shumë bashkim i forcave për t’i dalë në krye kësaj detyre”, ka thënë Konjufca.
Ai në seminarin “Promovimi i një parlamenti me ndjeshmëri gjinore” ka thënë se rritja e barazisë gjinore dhe pavarësia materiale e sociale e gruas është rruga e vetme.
“Çdo veprim institucional i cili e rrit pjesëmarrjen e grave në jetën publike dhe çdo masë e cila e rrit barazinë gjinore dhe pavarësinë materiale e sociale të gruas, është i domosdoshëm dhe rruga jonë e vetme e drejtë. Barazia gjinore nuk ka të bëjë vetëm me Ministrinë e Brendshme dhe me Ministrinë e Drejtësisë. Ajo ka të bëjë me çdo aspekt të jetës sonë, prej çerdheve, ku i çojmë fëmijet tanë, e deri te sjellja publike në funksion të krijimit të mundësive të barabarta dhe të një mjedisi social pa diskriminim gjinor”, ka thënë Konjufca ndër të tjera./teve1.info/
