Kryetari i Kuvendit të Republikës së Kosovës, Glauk Konjufca, priti ambasadorin e ri të Belgjikës në Kosovë, Grégoire Cuvelier, me të cilin diskutoi për zhvillimet aktuale, bashkëpunimin midis dy vendeve dhe mundësitë e avancimit të mëtejmë të tij, raporton teve1.info
Sipas një komunikate për medie të Kuvendit të Kosovës, duke e uruar për detyrën e re në krye të misionit diplomatik belg në Prishtinë, kryetari Konjufca e falënderoi ambasadorin Cuvelier për mbështetjen e vazhdueshme qe shteti mik i Belgjikës ia ka dhënë Kosovës në shumë fusha, duke e konsideruar të nevojshme vazhdimin e kësaj përkrahjeje edhe në proceset aktuale nëpër të cilat po kalon vendi ynë.
“Kreu i Kuvendit vuri në dukje agjendën e Republikës së Kosovës drejt integrimit euro-atlantik, sfidat e kësaj agjende dhe theksoi nevojën e përkrahjes nga vende mike, si Belgjika.
Duke e falënderuar kryetarin Konjufca për pritjen, ambasadori Grégoire Cuvelier konfirmoi mbështetjen e Brukselit zyrtar për Kosovën edhe në të ardhmen.
Në takim u diskutua gjithashtu për rëndësinë e thellimit të bashkëpunimit ndërparlamentar, marrëdhënieve ekonomike e diplomatike midis dy vendeve”, thuhet në komunikatë.
