Ministri i Punëve të Jashtme i Kosovës, Glauk Konjufca, ka dhënë një deklaratë të fortë dhe të qartë nga Haga, duke e kritikuar ashpër aktakuzën që ka ngritur Gjykata Speciale ndaj ish-krerëve të Ushtrisë Çlirimtare të Kosovës (UÇK).
Në një intervistë për mediat, ai ka theksuar besimin se aktakuzat do të bien dhe se drejtësia do të triumfojë për UÇK-në, e cila, sipas tij, nuk ka pasur asnjë qëllim kriminal.
“UÇK-ja nuk ka pasur asnjë ndërmarrje të përbashkët kriminale, duhet ta themi qartë”, ka thënë Konjufca, duke theksuar se prokuroria e ka paraqitur në mënyrë të gabuar si një organizatë me qëllime kriminale. Ai e konsideron këtë akuzë si një përpjekje të padrejtë për të barazuar luftën çlirimtare të Kosovës me krimet e Serbisë gjatë periudhës së luftës.
Konjufca ka shpjeguar se është e pabesueshme që UÇK-ja, e cila ka qenë aleate e NATO-s dhe ka luftuar për lirinë e Kosovës, akuzohet për krime të tilla.
“Si mund të pranojmë se një ushtri që ka luftuar në terren me NATO-n, ka qenë një organizatë kriminale? Si mund të besojmë se UÇK-ja e ka mashtruar komunitetin ndërkombëtar, duke bashkëpunuar me shtetet më të fuqishme të botës?” – tha ai, duke shtuar se “NATO ka intervenuar në Kosovë për të ndaluar krimet e Serbisë, dhe ky fakt është dëshmi e drejtpërdrejtë se UÇK-ja ka qenë në anën e drejtë”.
Ministri Konjufca ka vazhduar të shpjegojë ndjenjat e tij për aktakuzat dhe rëndësinë e kësaj lufte për popullin e Kosovës. Ai ka rikujtuar që UÇK-ja nuk luftoi vetëm për lirinë e Kosovës, por edhe për dinjitetin dhe të drejtat e çdo qytetari të Kosovës.
“Erdha këtu për të bërë pjesë të shënimit të një date të shënuar për Republikën e Kosovës, sepse pavarësia e saj është ditëlindja e Kosovës, një ditë që është ndihmuar dhe e mundësuar nga sakrificat e ushtarëve dhe dëshmorëve të UÇK-së.”
Konjufca gjithashtu ka theksuar se për të arritur pavarësinë, populli dhe Ushtria Çlirimtare e Kosovës dhanë shumë, dhe se aktakuzat janë një tentativë e dëmshme për të minimizuar këtë kontribut.
“Në momentet më vendimtare, ata që udhëhoqën UÇK-në u kapën armët dhe e drejtuan luftën, duke kontribuar në lirinë dhe pavarësinë e Kosovës. Ne i jemi gjithmonë mirënjohës dëshmorëve dhe atyre që janë gjallë dhe që udhëhoqën këtë luftë”, ka theksuar ai.
Në lidhje me gjykatën, Konjufca ka shpërthyer ndaj trajtimit të luftës çlirimtare të Kosovës. Ai ka shprehur pakënaqësi për atë se si janë trajtuar krimet e Serbisë, duke u fokusuar në një raport të pabazuar mbi trafikimin e organeve, i cili ka çuar në krijimin e një gjykate që, sipas tij, e ka pasur UÇK-në si shënjestër kryesore.
“Ka qenë një padrejtësi e madhe, sepse ka pasur një tentim shumë të rrezikshëm për të barazuar krimet e Serbisë me luftën çlirimtare të Kosovës”, ka thënë ai.
Konjufca ka theksuar gjithashtu se aktakuza nuk është vetëm për individët, por për të gjithë luftën çlirimtare të Kosovës.
“Aktakuza e lexova disa herë dhe besoj se e kam studiuar mirë. Kur ta lexoni me kujdes, do ta shihni se ajo është një gjykim për luftën çlirimtare të Kosovës, dhe kjo është diçka që ne nuk mund ta pranojmë”, ka përfunduar ai.
Në përfundim, Konjufca ka theksuar se është përgjegjës si shtet dhe si qytetar për të ngritur zërin dhe për të mbrojtur të vërtetën, dhe se qëllimi është që të dëgjohet zëri i Kosovës nga e gjithë bota.
“Ne nuk mund të lejojmë që të gjykohet lufta e UÇK-së dhe ne do të vazhdojmë të mbrojmë të vërtetën dhe lirinë tonë, pa dallim pozicionesh”, ka përfunduar ai.
