Kryetari i Kuvendit, Glauk Konjufca ka kërkuar që ndërkombëtarët të ndëshkojnë ndërhyrjet dhe agresionin e Serbisë në Kosovë.
Ai madje tha vlerëson se nëse Bashkimi Evropian e toleron agresionin e Serbisë, dialogut mes dy shteteve po i humb kuptimi.
“Çfarë fqinjësie të mirë dhe normalizimi raportesh mes dy vendeve mund të pretendohet nëse Bashkimi Europian e toleron një sjelle të tillë armiqësore të Serbisë ndaj Kosovës. Nëse BE e toleron këtë agresion të vazhdueshëm të Serbisë, atëherë përfundimisht dialogut po i humbet kuptimi”, ka shkruar Konjufca në Facebook.
Ai më tej e ka dënuar ashpër sulmin e sotëm ndaj gazetarëve në Leposaviq, por ka kërkuar që ndërkombëtarët nuk duhet të kalojnë pa ndëshkim për Serbinë
“E dënoj ashpër këtë sulm mbi gazetarët dhe kërkoj që kriminelet të vihen para drejtësisë. I bëjmë thirrje edhe një herë faktorit ndërkombëtar që ta shtojë presionin mbi Serbinë, si shkaktare të këtyre tensioneve, sepse s’mund të ketë qetësi dhe stabilitet nëse bandat vazhdojnë të ushtrojnë dhunë dhe terror mbi popullsinë e këtyre komunave, gazetarët dhe forcat e rendit. Kosova nuk do t’i tolerojë provokime të tilla, por as faktori ndërkombëtar nuk duhet t’i kalojë pa ndëshkim interferime të tilla të Serbisë në stabilitetin dhe sovranitetin e Kosovës”, ka shkruar Konjufca.