Kryetari në detyrë i Kuvendit të Kosovës, Glauk Konjufca, ka pritur të martën në takim kryetarin e Partisë Rome të Bashkuar të Kosovës, njëherazi deputet i zgjedhur i legjislaturës së ardhshme, Albert Kinollin, si dhe përfaqësues të komunitetit rom.
Sipas njoftimit Konjufca ka pranuar Mirënjohjen për Kontributin për Çështjen e Komunitetit Rom që mysafirët i dhanë atij në këtë Ditë Ndërkombëtare të Romëve.
Konjufca dhe Kinolli thuhet se kanë diskutuar çështje të aktualitetit politik dhe social të vendit, që ngërthejnë komunitetin rom në Kosovë.
“Ai tha se duhet ta shtojmë edhe më tutje përkushtimin dhe angazhimin tonë për zhvillim gjithnjë e më të madh shoqëror dhe ekonomik në Kosovë, me përfshirje të gjithanshme e të gjithmbarshme, në promovim të vazhdueshëm të demokracisë dhe të drejtave të njeriut, përkundër të gjitha formave të përjashtimit”, thuhet në njoftimin e Kuvendit të Kosovës.
Po ashtu, thuhet se ai solli në vëmendje se përfshirja e komunitetit rom, si dhe të gjithë komuniteteve joshumicë në jetën politike, shoqërore dhe ekonomike është interes jo vetëm i këtyre komuniteteve, por i të gjithë shoqërisë me aspirata të përparimit./teve1.info/
