Gjykata Themelore në Prishtinë, ka shpallur aktgjykim lirues ndaj kryetarit të Kuvendit të Kosovës, Glauk Konjufca i akuzuar për hedhje të gazit lotsjellës në Kuvend.
Në aktakuzë thuhet se në Kuvendin e Kosovës më 10 gusht 2016, në cilësi të deputetit, Konjufca ka hedhur gaz lotsjellës, me ç’rast është pamundësuar qëndrimi në sallë.
Sipas gjykatëses, Edita Çanta, vendimi për lirimin e tij u mor pasi nuk është provuar që Konjufca ka kryer veprën penale për të cilën akuzohej “Përdorimi i armës apo mjetit të rrezikshëm”.
“Gjykata të pandehurin e largon nga akuza për shkak se në pajtim me rrjedhën e procedurës penale nga provat personale dhe materiale të vlerësuara nga gjykata nuk është provuar se i pandehuri i ka kryer veprën penale për të cilën akuzohet”, ka thënë ajo.
Çanta po ashtu ka deklaruar se asnjëri nga dëshmitarët nuk e ka inkriminuar Konjufcën.
Kurse, për veprën penale “Pengimi i personit zyrtar në kryerjen e detyrës zyrtare” për të cilën ka arritur parashkrimi, thuhet se është refuzuar akuza.
Shpallja e aktgjykimit u bë në mungesë të Konjufcës.
Kujtojmë se Konjufca akuzohet për këtë veprim të kryer gjatë kohës sa ishte në opozitë, në periudhën ku po protestonin kundër miratimit të demarkacionit të Kosovës me Malin e Zi. /teve1.info/