Kryetari i Kuvendit të Kosovës, Glauk Konjufca në seancën solemne në nderim të komandantin të UÇK-së Ilaz Kodra, tha se me këtë datë do t`i kujton të masakruarit nga forcat serbe.
Në fjalimin e tij të mbajtur në foltoren e Kuvendit, Konjufca tha se komandanti Ilaz Kodra ka qenë ndër figurat më emblematike të UÇK-së, e cila sipas tij, i përket bërthamës themeluese të ushtrisë së Kosovës.
“ Jemi mbledhur këtu në një seancë të veçantë për ta nderuar dhe vlerësuar edhe njëherë figurën kombëtare të heroit të Kosovës, komandantin Ilaz Kodra në 25-vjetorin e rënies së tij heroikë për çlirimin dhe lirinë e Kosovës. Heroi Ilaz Kodra është ndër figurat më të emblematike të Ushtrisë Çlirimtare të Kosovës e cila i përket bërthamës themeluese të kësaj ushtrie të lavdishme në krye me komandantin legjendar Adem Jashari. Kontributi i komandantit Ilaz Kodra për organizimin dhe strukturimin e luftës çlirimtare është i hershëm, sikurse pjesëmarrja e tij në lufte dhe për shumë aksione deri kur ra në altarin e lirisë më 30 prill të vitit 1999 në mbrojtje të popullatës civile”, tha Konjufca.
Tutje, ai ka theksuar se UÇK-ja është kapitulli më i ngritur i historisë së Kosovës.
“Ushtria Çlirimtare e Kosovës është kapitulli më i ngritur i historisë sonë të shek XX. Me këtë datë 30 prill do t`i kujtojmë e do t`i nderojmë të masakruarit nga forcat serbe këto vite më parë në shumë fshatra të tjera të Drenicës. Lufta e Serbisë ishte gjenocidale sepse ajo vrau fëmijë, gra e pleq, gjaku i këtyre të pafajshme kurrë nuk do të falet e kurrë nuk do të harrohet nga ne, por do ta kujtojmë Serbinë si kriminale dhe gjenocidale, e cila ende nuk është penduar dhe nuk e ka ndryshuar orientimin dhe kursin e saj politik”, shtoi Konjufca.
Ai gjithashtu përmendi 2 majin e vitit 1999, ku Serbia kreu Masakrën e Studimes, ku u vranë 116 shqiptar.
“Pikërisht në këtë ditë, Serbia kreu edhe masakrën më të madhe në Kosovë, Masakrën e Studimes ku me gjak dhe ashpërsi i vrau dhe i masakroj 116 shqiptar”, deklaroi kryeparlamentari./teve1.info/
