Deputeti i Vetëvendosjes, Gluk Konjufca ka kërkuar kohë shtesë për konsultime duke qenë se sipas tij e kanë parë që partitë opozitare e kanë qëndrimin e njëjtë ndaj propozimit të tyre për kryeparlamentar.
Konjufca ka thënë se Lëvizja Vetëvendosje e kërkon këtë kohë për të arritur një marrëveshje politike me opozitën në mënyrë që siç ka thënë ai ‘të mos përsëritet sërish situata e njëjtë si në tri tentimet paraprake.
“Lëvizja Vetëvendosje pa dyshim që e ka emrin e njëjtë për kryeparlamentar, ajo është Albulena Haxhiu si e propozuar por ne meqenëse e kemi parë se të gjitha subjektet politike qysh dje janë prononcuar se do ta kishin qëndrimin e njëjtë edhe në këtë seancë unë mendoj që kjo situatë politike nuk mund të zgjidhet përveq se me një marrëveshje politike, pra ashtu siç votohen nënkryetarët e Kuvendit atë koncept duhet ta kishte edhe kryetari i Kuvendit. Pa krijimin e një mazhorance këtu në Kuvend për kryetarin e Kuvendit nuk do të mund të themelohet vetë Kuvendi, mirëpo e njëjta logjikë ëshë edhe për nënkryetarët se sikur ne ta kishim shumicën do të mund t’i bllokonim edhe ne nënkryetarët e Kuvendit. A është e arsyeshme? Ne kërkojmë një kohë shtesë që të mos përsëritet situata e njëjtë të cilën e patëm tri herë radhazi në Kuvendin e Kosovës”, ka thënë ai.
