Konjufca së bashku me Mehajn sot kanë bërë homazhe tek varri i Ilir Konushefcit, në lagjen “Velania” në Prishtinë.
Konjufca tha se humbja e “Kombandant Mërgimit” ishte humbje e madhe për organizimin e UÇK-së.
“Komandant Mërgimi i orëve të para të organizimit të rezistencës së armatosur është njëra ndër figurat më të rëndësishme të Ushtrisë Çlirimtare të Kosovës. Rënia e tij ishte humbje e madhe për organizimin e ushtrisë sonë. Brenda një harku kohor prej 5 ditësh në maj të vitit 1998 ranë në altarin e lirisë Iliri Konushevci, Bahri Fazliu dhe Agron Rrahmani. Por rënia e tyre e lavdishme i ngjeshi radhët e UÇK-së me mijëra çlirimtarë”, ka shkruar Konjufca.
Tutje ai tha se sa më shumë që kujtojmë heroizmin e Ilir Konushefcit dhe Hazir Malajt dhe luftën e UÇK-së, sipas tij aq më shumë shtohet dashuria e përkushtimi ndaj atdheut, shkruan teve1.info
Konjufca theksoi se falë sakrificës së tyre dhe të tjerëve që kanë rënë për liri, Republika e Kosovës sot është e pavarur.
“Sa më shumë e kujtojmë heroizmin e Ilirit, të doktor Hazirit dhe luftën e lavdishme të Ushtrisë Çlirimtare të Kosovës, aq më shumë na shtohet dashuria dhe përkushtimi ndaj atdheut. Falë sakrificës së tyre dhe mijëra të rënëve, Republika e Kosovës sot frymon lirshëm dhe e pavarur”, ka shkruar Konjufca.
“Vepra atdhetare e heronjve, dëshmorëve dhe të rënëve për liri do të kujtohet dhe nderohet brez pas brezi. Përjetësisht”, shtoi ai.
Ndërsa, Mehaj ka thënë se Ilir Konushefci atdheut dhe luftës i kishte falur gjithçka që kishte.
“Atdheut dhe luftës për çlirim, i kishte falur gjithçka që kishte, angazhimi e rrugëtimi i tij ishte i gjatë dhe i pandalshëm. Ai ishte njëri nga themeluesit e UÇK-së, kishte rolin kryesor për sjelljen e armatimit në Kosovë. Mbi tridhjetë herë kishte hyrë në Kosovë me armë të kalibrave të ndryshëm. Gjithashtu, ai solli edhe shumë eprorë profesionist në radhët e UÇK-së”, ka shkruar Mehaj në Facebook.
“Si gjithnjë në krye të detyrës, duke sjellë një kamion me armatim, derisa po udhëtonin për në Bajram Curr, së bashku me mjekun Hazir Mala, ai u vra nga dora e zgjatur e pushtetit serb”, tha Mehaj.
Mehaj theksoi se Ilir Konushefci ka lënë gjurmë të pashlyeshme në themelimin, organizimin dhe ngritjen e UÇK-së, e që sipsaj tij gjurmë të cilat do të mbesin gjallë gjithmonë ndër breza të ardhshëm.
