Një qytetar është arrestuar për shkak të urdhërarrestit aktiv derisa të njëjtit i janë gjetur dhe konfiskuar rreth njëmijë kilogramë fara të kungullit dhe rreth 500 kilogramë arra të futura ilegalisht në Kosovë, raporton teve1.info
Sipas Policisë së Kosovës rasti ka ndodhur në pikëkalimin kufitar të Republikës së Maqedonisë së Veriut me Republikën e Kosovës.
“Me datën 22 mars 2023, rreth orës 07:00, njësitë policore Taskforcë nga Policia Kufitare kanë ndaluar një automjet transportues në Mjak të Vitisë, me drejtues dhe pasagjer, dy të dyshuar meshkuj kosovarë, ku gjatë legjitimimit të tyre ka rezultuar se i dyshuari, drejtuesi i mjetit, me iniciale I. M., viti i lindjes 1993, kishte urdhërarrest aktiv të lëshuar nga gjykata kompetente, ku përveç kësaj po ashtu është vërtetuar se edhe mjeti të cilin e drejtonte ishte pa regjistrim valid.
Pas veprimeve të ndërmarra është realizuar edhe një kontroll në automjetin e lartcekur, me ç’rast janë gjetur dhe janë konfiskuar një sasi e mallrave si në vijim:
• 40 thasë fara kungulli x 25 kg= 1000 kg,
• 50 pako arra të qëruara x10.5kg= 525kg, për të cilat të dyshuarit nuk posedonin dokumente përkatëse dhe se të njëjtit po ashtu kanë pranuar se malli i ngarkuar është futur përmes rrugëve ilegale nga Republika e Maqedonisë së Veriut, në Republikën e Kosovës”, thuhet në komunikatën e Policisë.
Sipas njoftimit, me vendim të prokurorit i dyshuari i cili kishte urdhërarrest i është dorëzuar stacionit policor përkatës për procedura të mëtejme.
Kurse, malli i konfiskuar i është dorëzuar Doganës së Kosovës, ndërsa rasti procedohet në procedurë të rregullt.
