Policia e Kosovës ka konfiskuar armë dhe municion gjatë një patrullimi në fshatin Radosevika të Zubin-Potokut.
Sipas raportit 24-orësh të policisë, zyrtarët kanë hasur në një shtëpi të pabanuar ku janë gjetur një armë zjarri e tipit AK-47, dy karikatorë – njëri prej tyre i mbushur me 27 fishekë – si dhe dy fishekë gjuetie dhe pajisje të tjera ushtarake.
Policia ka bërë të ditur se gjatë hetimeve është identifikuar pronari i objektit. Me urdhër të prokurorit është kryer bastisje edhe në një tjetër shtëpi të tij në Zubin-Potok.
Gjatë kontrollit në atë lokacion janë gjetur edhe një armë e gjatë AK-47, katër karikatorë dhe rreth 120 fishekë.
I dyshuari është intervistuar nga autoritetet dhe me vendim të prokurorit, është dërguar në mbajtje, ndërsa rasti po hetohet më tej.
“Njësiti policor gjatë patrullimit në një shtëpi të pabanuar ka hasur në një armë zjarri AK-47, dy karikator (njëri i mbushur me 27 fishekë), dy fishekë të gjuetisë dhe disa pajisje tjera ushtarake”, thuhet në raportin ditor të PK-së. /teve1.info/
