Forcat e qenve, vendosën t’i testojnë në këtë vend.
Mbrëmjen e së dielës, në rrugën “Tusuz – Hoçë e Qytetit” u takuan Hekuran Shala e personi me inicialet E.B.
Të dy këta me vete, morën edhe qentë e tyre.
Por, pas përleshjes së qenve, lindi një mosmarrëveshje edhe mes pronarëve.
Pas kësaj, dyshohet se E.B goditi me thikë Hekuran Shalën, ndërsa ky i fundit nuk arriti t’i mbijetonte plagëve të marra.
E të martën, Prokuroria Themelore e Prizrenit, kërkoi paraburgim për dorasin e dyshuar.
Në kërkesë ka zbardhur edhe rrethanat se si erdhi deri të vrasja që tronditi Prizrenin.
“Sipas kërkesës së prokurorisë, me datë 10.08.2025 rreth orës 20:30 min në lagjen “Tusuz” në rrugën “Lapidari” në Prizren, i pandehuri E.B., pas një mosmarrëveshjeje paraprake, në mënyrë dinake dhe duke shfrytëzuar besimin e viktimës, me dashje e privon nga jeta tani më të ndjerin H.Sh., në atë mënyrë që fillimisht i nxisin qentë e tyre në një përleshje dhe pas një fjalosjeje të shkurtër, i pandehuri papritmas dhe në mënyrë të befasishme e nxjerr thikën-patente dhe e godet H.Sh., me ç’rast i njëjti dërgohet në QKUK në Prishtinë, ku ndërron jetë nga plagët e marra. Me këto veprime E.B., ka kryer veprën penale “Vrasja e rëndë” sipas KPRK-së”, kanë thënë nga Prokuroria Themelore.
E kërkesa e prokurorisë për paraburgim, u miratua nga Gjykata Themelore në Prizren, Departamenti i Krimeve të Rënda.
“Gjyqtari i Procedurës – Artan Sejrani– ka caktuar masën e paraburgimit, në kohëzgjatje prej një (1) muaji, për të pandehurin E.B., e cila mund të zgjasë deri më datën 11.09.2025 për shkak të dyshimi të bazuar se ka kryer veprën penale, vrasja e rëndë nga neni 173 par. 1 nën par. 1.4, dhe mbajtja në pronësi, kontroll ose posedim të pa autorizuar të armëve nga neni 366 par. 1 të KP-së”, thuhet në reagimin e Gjykatës Themelore në Prizren.
Në arsyetimin për caktimin e masës së paraburgimit, gjykata shton se me lënien në liri të të pandehurit ekziston rreziku i ndikimit në dëshmitarë, apo fshehjes së fakteve dhe provave tjera materiale meqë çështja penale është në fazën fillestare të hetimit.
